Transcription
1
Monsieur, bien que sache que serés esté adverty de Granne des cources prises des mulletz chargées despicirye et aussy
2
de quelques paquetz que les ennemys ont pillé, le tout à mesme instant, je nay pour cela vollu fallyr de vous envoyer ce
3
mot pour vous faire veoyr la lettre que jay receu à unze [heures] du soyr des consulz de Chasteauneuf de Mazans, affin que si les
4
ditz ennemys avoyent surprins quelques unes de voz lestres qui les conviat ha faire siuvant icelles quelques entreprises,
5
quil vous plaise, monsieur, leur en oster le moyen. Au reste, jay nouvelles de toutz coustés quilz veullent entreprandre sus
6
ceste ville et quilz y ont intelligence, ce que je ne puis croyre, veu que pour la conservation dicelle, il me semble veoyr
7
ung chacun de bon piet, de fasson que je ne crayns point quil nous mesadvienne dedans. Je desideroys de bon coeur que
8
nous eussions aussi bien le moyen de nous guarder à la pleyne car, à la verité, je crains denvoyer mes gens de piet hors
9
dicy pour sembusquer entre Denmons ou Alleyrac, sachant bien que les ennemys nont faulte despion et que leur
10
retraicte leurs est grandement incommode, daultant que certain nombre de cavallerye les desferoit. Je salue voz
11
bonnes graces par mes très humbles recommandations, priant Notre Seigneur vous donner
12
monsieur, en très bonne sancté, longue et hereuse vye. Au mon[télim]ar, ce XVIIe febvrier
13
Vostre très humble filz et à jamays très hobeyssant
14
serviteur,
15
hourche